Автор неизвестен -- Древнерусская литература - Слово о полку Игореве

горамъ кыевьскымъ

сего бо нынѣ сташа

стязи рюрикови

а дроузии давидови

нъ розѣно ся имъ хоботы пашють

копия поють

VIII

На доунаи ярославьнинъ

гласъ^ся слышить

зегъзицею незнаемь

рано кычеть

полечю рече зегъзицею по Доунаеви

омочю роукавъ бебрянъ въ рѣцѣ въ каялѣ

оутьроу кънязю кровавыѣ его раны

на жестоцѣмь его тѣлѣ

ярославьна рано плачеть

въ поутивли на забралѣ а рькоучи

о вѣтрѣ вѣтрило

чемоу господине

насильно вѣеши

чемоу мычеши

хыновьскыѣ стрѣлъкы

на своею нетроудьною крильцю

на моеѣ лады вои

мало ли ти бяшеть горѣ

подъ облакы вѣяти

лелѣючи корабли на синѣ морѣ

чемоу господине

мое веселие

по ковылию развѣя

ярославьна рано плачеть

поутивлю городоу

на заборолѣ а рькоучи

о дънепре словоутицю

ты пробилъ еси каменьныѣ горы

сквозѣ землю половецькоую

ты лелѣялъ еси на собѣ

святославли насады

до пълкоу Кобякова

възлелѣи господине

мою ладоу къ мьнѣ

а быхъ не сълала

къ немоу слезъ

на море рано

ярославьна рано плачеть

въ поутивли на забралѣ а рькоучи

свѣтьлое и тресвѣтьлое сълньце

вьсѣмъ тепло и красьно еси

чемоу господине простьре

горячюю свою лоучю на лады вои

въ полѣ безводьнѣ

жажею имъ лоучи съпряже

тоугою имъ тоулы затъче

Прысноу море полоунощи

идоуть съморци мьглами

игореви кънязю

богъ поуть кажеть

из земли половецькыѣ

на землю роуськоую

къ отьню златоу столоу

погасоша вечероу зори

игорь съпить игорь бъдитъ

игорь мыслию поля мѣритъ

отъ великаго доноу

до малаго доньца

комонь въ полоуночи

вълоуръ свисноу за рѣкою

велить кънязю разоумѣти

кънязю игорю небыть кликноу

стоукноу земля въшюмѣ трава

вежи ся половецькыѣ подвизашася

А игорь кънязь поскочи

горьностаемь къ тростию

и бѣлымь гоголемь на водоу

въвьржеся на бързъ комонь

и скочи съ него босымь вълкомь

и потече къ лоугоу доньца

и полетѣ соколомь подъ мьглами

избивая гоуси и лебеди

заоутрокоу и обѣдоу и оужинѣ

коли игорь соколомь полетѣ

тогда вълоуръ вълкомь потече

троуся собою стоуденоую росоу

претъргоста бо своя бързая комоня

IX

Донець рече

къняже игорю

не мало ти величия

а коньчакоу нелюбия

а роуськѣи земли веселия

игорь рече о доньче

не мало ти величия

лелѣявъшю кънязя на вълнахъ

стьлавъшю емоу зелѣноу травоу

на своихъ сьребреныхъ березѣхъ

одѣвавъшю его теплыми мьглами

подъ сѣнию зеленоу древоу

стрежаше его гоголемь на водѣ

чаицами на строуяхъ

чьрнядьми на ветрѣхъ

не тако ли рече рѣка стоугна

хоудоу строую имѣя

пожьръши чюжи роучьи и строугы

ростьрена къ оустоу

оуношю кънязю ростиславоу затвори

дънѣ при темьнѣ березѣ

дънѣпрь темьнѣ березѣ

плачеться мати ростислав^ля

по оуноши кънязи ростиславѣ

оуныша цвѣти жалобою

и древо ся тоугою

къ земли прѣклонило

А не сорокы вътроскоташа

на слѣду Игоревѣ

ѣздить гзакъ съ коньчакомь

тогда врани не граяхоуть

галици помълкоша

сорокы не троскоташа

полозие пълзоша

только дятьлове текътомь

поуть къ рѣцѣ кажють

соловии веселыми пѣс^ньми

свѣтъ повѣдають

мълвить гъза къ коньчакови

аже соколъ къ гнѣздоу летить

соколича рострѣляевѣ

своими злачеными стрѣлами

рече коньчакъ ко гъзѣ

аже соколъ къ гнѣздоу летить

а вѣ сокольца опоутаевѣ

красьною дѣвицею

и рекъ гъзакъ къ коньчакови

аще его опоутаевѣ красьною дѣвицею

ни нама боудеть сокольца

ни нама красьны дѣвице

то почьноуть наю пътици

бити въ полѣ половецькомь

Рекъ^ста боянъ и ходына

святъславля пѣс^нотворьца

стараго веремени

ярославля и ольгова

коганя хоти

тяжько ти головѣ кромѣ плечю

зъло ти тѣлоу кромѣ головы

роуськѣи земли без игоря

солньце свѣтиться на небесѣ

игорь кънязь въ роуськѣи земли

дѣвици поють на доунаи

вьються голоси чрезъ море до кыева

игорь ѣдеть по боричевоу

къ святѣи богородици пирогощеи

страны ради гради весели

пѣвъше пѣснѣ старымъ къняземъ

а по томь молодымъ пѣти

славу --">