Автор неизвестен -- Древнерусская литература - Слово о полку Игореве

Слово о полку Игореве

СЛОВО О ПЪЛКОУ ИГОРЕВѢ ИГОРЯ СЫНА СВЯТЪСЛАВЛЯ ВЪНОУКА ОЛЬГОВА

Реконструкция текста А. В. Дыбо

Стиховая запись Андрея Чернова^[1]

I

Не лѣпо ли ны

бяшеть братие

начати старыми словесы

троудьныхъ повѣстии

о пълкоу игоревѣ

игоря святъславлича

начати же ся тъи пѣсни

по былинамъ сего времени

а не по замышлению бояню

боянъ бо вѣщии

аще комоу хотяше

пѣснѣ творити

то растѣкашеться мыслию по древоу

сѣрымь вълкомь по земли

шизымь орьломь подъ облакы

помьняшеть бо речь

пьрвыхъ временъ оусобицѣ

тогда поущашеть

десять соколовъ

на стадо лебедѣи

которыѣ дотечаше

та преди пѣс^нь пояше

старомоу ярославоу

храбромоу мьстиславоу

иже зарѣза редедю

предъ пълкы касожьскыми

красьномоу романови святъславличю

боянъ же братие не десять соколовъ

на стадо лебедѣи поущаше

нъ своѣ вѣщиѣ пьрсты

на живыѣ строуны въскладаше

они же сами къняземъ

славоу рокотахоу

Почьнемъ же братие повѣсть сию

отъ стараго владимера

до нынѣшьняго игоря

иже истягноу оумъ крѣпостию своею

и поостри сьрдьца своего моужествомь

напълнивъся ратьнаго доуха

наведе своѣ храбрыѣ пълкы

на землю половѣцькоую

за землю роуськоую

тогда игорь възьрѣ

на свѣтьлое сълньце

и видѣ отъ него тьмою

вьсѣ своѣ воѣ прикрыты

и рече игорь къ дроужинѣ своеи

братие и дроужино

лоуце жь бы потятоу быти

неже полоненоу быти

а въсядемъ братие

на свои бързыѣ комони

да позьримъ синего доноу

съпала кънязю оумъ похоть

и жалость емоу знамение застоупи

искоусити доноу великаго

хощю бо рече копие приломити

конець поля половецькаго

съ вами роусици

хощю главоу свою приложити

а любо испити шеломомь доноу

О бояне соловию стараго времени

абы ты сиѣ пълкы оущекоталъ

скача славию по мысленоу древоу

летая оумомь подъ облакы

свивая славы оба полы сего времени

рища въ тропоу трояню

чресъ поля на горы

пѣти было пѣс^нь игореви

того въноукоу

не боуря соколы занесе

чресъ поля широкая

галици стады бѣжать

къ доноу великомоу

чи ли въспѣти было

вѣщеи бояне велесовъ въноуче

комони ръжють за соулою

звенить слава въ кыевѣ

троубы троубять въ новѣградѣ

стоять стязи въ поутивли

II

Игорь жьдеть мила брата вьсеволода

и рече емоу боуи тоуръ вьсеволодъ

одинъ братъ одинъ свѣтъ

свѣтьлыи ты игорю

оба есвѣ святъславлича

сѣдьлаи брате свои

бързыѣ комони

а мои ти готови осѣдьлани

оу коурьска на переди

а мои ти коуряни

съвѣдоми къмети

подъ троубами повити

подъ шеломы възлелѣяни

конець копия въскърмлени

поутие имъ вѣдоми

яроугы имъ знаеми

лоуци оу нихъ напряжени

тоули отъворени

сабли изострени

сами скачють

акы сѣрыи вълци

въ полѣ ищючи

собе чьсти

а кънязю славы

Тогда въстоупи игорь кънязь

въ златъ стремень и поѣха

по чистомоу полю

сълньце емоу тьмою поуть застоупаше

нощь стоноущи емоу грозою

пътичь оубоуди свистъ звѣри

нъ съби^ся дивъ

кличеть вьрхоу древа

велить послоушати земли незнаемѣ

вълзѣ и поморию и посоулию

и соурожю и корсоуню

и тобѣ тъмоутороканьскыи бълване

а половьци неготовами дорогами

побѣгоша къ доноу великомоу

кричать тѣлѣгы полоунощи

рьци лебеди роспоущени

игорь къ доноу вои ведеть

оуже бо бѣды его пасеть

пътиць по доубию

вълци грозоу въсрожать по яроугамъ

орьли клекътомь на кости звѣри зовоуть

лисици брешють на чьрленыѣ щиты

о роуськая земле

оуже за шеломянемь еси

дълго ночь мьркнеть

заря свѣтъ запала

мьгла поля покрыла

щекотъ славии оусъпе

говоръ галичь оубоуди

роусичи великая поля

чьрлеными щиты перегородиша

ищючи собѣ чьсти а кънязю славы

Съ зарания въ пятъкъ потопъташа

поганыѣ пълкы половецькыѣ

и расоуша^ся стрѣлами по полю помьчаша

красьныѣ дѣвъкы половецькыѣ

а съ ними злато и паволокы

и драгыѣ оксамиты

орьтъмами и японьчицами и кожюхы

начаша мосты мостити

по болотомъ и грязивымъ мѣстомъ

и вьсякыми --">