Автор неизвестен -- Древнерусская литература - Слово о полку Игореве

мычючи

въ пламянѣ розѣ

жены роуськыѣ въсплакаша^ся а рькоучи

оуже намъ своихъ милыхъ ладъ

ни мыслию съмыслити

ни доумою съдоумати

ни очима съглядати

а злата и сьребра

ни мало того потрепати

а въстона бо братие

кыевъ тоугою

а чьрниговъ напастьми

тоска разлияся по роуськѣи земли

печаль жирьна тече

середь земли роуськыѣ

а кънязи сами на собе

крамолоу ковахоу

а погании сами

побѣдами нарищюще

на роуськоую землю

емляхоу дань по бѣлѣ отъ двора

V

Та бо дъва храбрая святъславлича

игорь и вьсеволодъ

оуже лъжю оубоуди^ста

котороую то бяше оусъпилъ

отець ею святъславъ

грозьныи великыи кыевьскыи

грозою бяшеть притрепеталъ

своими сильными пълкы

и харалоужьными мечи

настоупи на землю половецькоую

притопъта хълми и яроугы,

възмоути рѣкы и озера

исоуши потокы и болота

а поганаго кобяка из лоукоу моря

отъ желѣзьныхъ великыхъ

пълковъ половецькыхъ

яко вихърь вытърже

и падеся кобякъ въ граде кыевѣ

въ гридьницѣ святъславли

тоу нѣмьци и венедици

тоу греци и морава

поють славоу святъславлю

кають кънязя игоря

иже погроузи жиръ

во дънѣ каялы

рѣкы половецькыѣ

роуськаго злата насыпаше

тоу игорь кънязь высѣдѣ

из сѣдьла злата

а въ сѣдьло кощиево

оуныша бо градомъ забралы

а веселие пониче

А святъславъ моутенъ сонъ видѣ

въ кыевѣ на горахъ

си ночь съ вечера

одѣвахоуть мя рече

чьрною паполомою

на кровати тисовѣ

чьрпахоуть ми синее вино

съ троудомь съмѣшено

сыпахоуть ми тъщими тоулы

поганыхъ тълковинъ

великыи женьчюгъ на лоно

и нѣгоують мя

оуже дъскы бес кнѣса въ моемь

теремѣ златовьрсѣмь

вьсю нощь съ вечера

боусови врани

възграяхоу оу плѣсьньска на болони

бѣша дебрь^скы сани

и несоша^ся къ синемоу морю

И рькоша бояре кънязю

оуже къняже тоуга оумъ полонила

се бо дъва сокола сълѣтѣста

съ отьня стола злата

поискати града тьмоутороканя

а любо испити шеломомь доноу

оуже соколома крильца припѣшали

поганыхъ саблями

а самою опоуташа

въ поутины желѣзьны

темьно бо бѣ въ третѣи день

дъва сълньца помѣркоста

оба багряная стълпа погасоста

и съ нима молодая мѣсяца

олегъ и святъславъ

тьмою ся поволокоста

на рѣцѣ на каялѣ

тьма свѣтъ покрыла

по роуськѣи земли

простьрошася половьци

акы пардоуше гнѣздо

и въ морѣ погроузиста

и великое боуиство

подаста хынови

оуже сънесеся хоула на хвалоу

оуже тресноу ноужа на волю

оуже вьржеся дивъ на землю

се бо готьскыѣ красьныѣ дѣвы

въспѣша на березѣ синемоу морю

звоня роуськымь златомь

поють веремя боусово

лелѣють месть шароканю

а мы оуже дроужина жадьни веселия

VI

Тогда великыи святъславъ

изрони злато слово

съ слезами съмѣшено и рече

о моя сыновьча

игорю и вьсеволоде

рано еста начала

половецькоую землю

мечи цвѣлити

а собѣ славы искати

нъ нечестьно одолѣсте

нечестьно бо кровь

поганоую пролиясте

ваю храбрая сьрдьца

въ жестоцемь харалоузѣ съкованѣ

а въ боуести закаленѣ

се ли сътвористе

моеи сьребренеи сѣдинѣ

а оуже не вижю власти

сильнаго и богатаго и мъноговои

брата моего ярослава

съ чьрниговьскыми былями

съ могоуты и съ татраны

и съ шельбиры и съ топчакы

и съ ревоугы и съ ольберы

тии бо беc щитовъ

съ засапожьникы

кликомь пълкы побѣждають

звонячи въ прадѣдьнюю славоу

нъ рекосте

моужаимѣ ся сами

передьнюю славоу сами похытимъ

а задьнею ся сами подѣлимъ

а чи диво ся братие

староу помолодити

коли соколъ въ мытехъ бываеть

высоко пътиць възбиваеть

не дасть гнѣзда своего въ обидоу

нъ се зъло къняжье ми непособие

на ниче ся годины обратиша

се оу римъ кричать

подъ саблями половецькыми

а володимѣръ подъ ранами

тоуга и тоска сыноу глѣбовоу

великыи къняже вьсеволоде

не мыслию ти прелетѣти издалеча

отьня злата стола поблюсти

ты бо можеши вългоу веслы раскропити

а донъ шеломы выльяти

аже бы ты былъ то была бы

чага по ногатѣ

а кощеи по резанѣ

ты бо можеши --">