Автор неизвестен -- Древнерусская литература - Слово о полку Игореве

оузорочьи половѣцькыми

чьрленъ стягъ

бѣла хоруговь

чьрлена челъка

сьребрено строужие

храбромоу святъславличю

дремлеть въ полѣ ольгово

хороброе гнѣздо

далече залетѣло

не было нъ

обидѣ порождено

ни соколоу ни кречетоу

ни тобѣ чьрныи воронъ

поганыи половьчине

гъзакъ бѣжить сѣрымь вълкомь

коньчакъ емоу слѣдъ править

къ доноу великомоу

III

Дроугаго дьни вельми рано

кровавыѣ зори свѣтъ повѣдають

чьрныѣ тоучѣ съ моря идоуть

хотять прикрыти четыре солньца

а въ нихъ трепещють синѣѣ мълнии

быти громоу великомоу

ити дождю стрѣлами

съ доноу великаго

тоу ся копиемъ приламати

тоу ся саблямъ потроучати

о шеломы половецькыѣ

на рѣцѣ на каялѣ

оу доноу великаго

о роуськая землѣ

оуже за шеломянемь еси

се вѣтри стрибожи въноуци

вѣють съ моря стрѣлами

на храбрыѣ пълкы игоревы

земля тоутнеть

рѣкы моутьно текоуть

пороси поля прикрывають

стязи глаголють

половьци идоуть отъ дона

и отъ моря и отъ вьсѣхъ странъ

роуськыѣ пълкы остоупиша

дѣти бѣсови кликомь

поля перегородиша

а храбрии роусици преградиша

чьрлеными щиты

Яръ тоуре вьсеволодѣ

стоиши на борони

прыщеши на вои стрѣлами

гремлеши о шеломы

мечи харалоужьными

камо тоуръ поскочаше

своимь златымь шеломомь посвѣчивая

тамо лежать поганыѣ

головы половецькыѣ

поскепаны саблями калеными

шеломы оварьскыѣ

отъ тебе яръ тоуре вьсеволоде

кая раны дорога братие

забывъ чьсти и живота

и града чьрнигова

отьня злата стола

и своѣ милыѣ хоти

красьныѣ глѣбовьны

съвычая и обычая

Были вѣчи трояни

миноула лѣта ярославля

были пълци ольговы

ольга святъславлича

тъи бо олегъ

мечемь крамолоу коваше

и стрѣлы по земли сѣяше

стоупаеть въ златъ стремень

въ градѣ тьмоуторокани

то же звонъ слыша

давьныи великыи ярославъ

а сынъ вьсеволожь

владимѣръ по вься оутра

оуши закладаше въ чьрниговѣ

бориса же вячеславлича

слава на соудъ приведе

и на каниноу зеленоу

паполомоу постьла

за обидоу за ольговоу

храбра и млада кънязя

съ тоѣ же каялы святопълкъ

полелѣя отьца своего

межю оугорьскыми иноходьци

ко святѣи софии къ кыевоу

тогда при ользѣ гориславличи

сѣяшеться и растяшеть оусобицами

погыбашеть жизнь дажьбожа въноука

въ къняжахъ крамолахъ

вѣци человѣкомъ съкратиша^ся

тогда по роуськѣи земли

рѣтко ратаевѣ кыкахоуть

нъ часто врани граяхоуть

троупия собѣ дѣляче

А галици свою речь говоряхоуть

хотять полетети на оуедие

то было въ ты рати и въ ты пълкы

а сицеи рати не слышано

IV

Съ зарания до вечера

съ вечера до свѣта

летять стрѣлы каленыѣ

гримлють сабли о шеломы

трещать копия харалоужьная

въ полѣ незнаемѣ

середи земли половецькыѣ

чьрна земля подъ копыты

костьми была посѣяна

а кровию польяна

тоугою възидоша

по роуськѣи земли

чьто ми шюмить чьто ми звенить

давеча рано предъ зорями

игорь пълкы заворочаеть

жаль бо емоу

мила брата

вьсеволода

бишася день

бишася дроугыи

третьяго дьни къ полоудьнию

падоша стязи игоревы

тоу ся брата разлоучиста

на березѣ быстрыѣ каялы

тоу кроваваго вина не доста

тоу пиръ доконьчаша

храбрии роусичи

сваты попоиша

а сами полегоша

за землю роуськоую

ничить трава жалощами

а древо ся тоугою

къ земли преклонило

ОУже бо братие

невеселая година въстала

оуже поустыни силоу прикрыла

въстала обида

въ силахъ дажьбожа въноука

въстоупила дѣвою

на землю трояню

въсплескала лебединыма крылома

на синѣмь море оу доноу

плещючи оубоуди жирьня веремена

оусобица къняземъ на поганыѣ погыбе

рекоста бо братъ братоу

се мое а то мое же

и начаша кънязи про малое

се великое мълвити

а сами на собѣ крамолоу ковати

а погании съ вьсѣхъ странъ

прихождахоу съ побѣдами

на землю роуськоую

О далече заиде соколъ

пътиць бья къ морю

а игорева храбраго

пълкоу не крѣсити

за нимь кликноу карна

и жьля поскочи

по роуськѣи земли

смагоу людемъ --">